Amerika het
dr Trump und s’Goudetau het ab jetz dr Rüschu der Erscht.
Liebi
Agfrässni vo dr 5. Johreszit. Äs isch klar, ass so nümm cha witer goh. Jetzt wo dr Rüschu dr erscht s’Zepter
übernimmt, muess im Goudetau scho einiges besser wärde.
I doude nit,
ass mir im Städteranking die letschti Gmein si. Mindestns 10 Räng vor Bauschtu miesse mir ganz klar cho.
Das bedingt natürlich, as mr einiges ändere i dere Gmein. Folgendes wird ab sofort
veralasst, wöis attraktiver macht:
1. Iwanderer us Bauschtu und usem Göi
gits nümm, höchschtens, wenn sie meeh as 100'000 Franke Stüre zahle.
2. S’Schuauhus Ramiswiu, wo jo ab
Herbscht leer stoht, wird umbouet zu mene Hotel, 12 Luxussuite, mit eme
Top-Reschterant im Parterre. Id Chuchi chund dr Mosimaa aus Schef. S’Inventar chunt
vo de gschlossene Beize vom Fluri Pauli, inclusiv Zimmerusrüschtig vo der
Limmerschlucht. D`Leitig übernäme gmeinsam dr Armin Müller und dr Martin
Diesler, wo jo jetz beidi pangsioniert si.
3.
Dr Raschtplatz
Stoute heisst ab sofort Rüschuplatz.
4.
D`1. Auguschtfiir
wird ufem Rüschuplatz abghaute, duuret 3 Täg und für das Johr isch dr Gölä
angaschiert.
5.
Uf dr Chätzlimatt
wird ä Fäschthütte ufgstöut, wo blibt stoh. Zahut wird si vo dr Raiffise, wo de
ändlich weiss, wo si ihri Johresversammlig cha abhaute. Opere und Musical immer
i de grade Monet. Einisch im Monet isch Tschessmatinee. D`Awohner, wo sich
wägem Lärm vo de vüune Fescht miesse ergere, schickt me jewius ä Wuche id
Ferie.
6.
S`Areau vom
30er-Klub wird usbouet zu nere Superbiitsch, mit Paume und Strandchörb für 500
Persone. Zischtig und Fritig isch FKK. Itritt ab 18 – 98 a dene Täg.
D`Autofahrer näbedra uf dr Stross, miesse mit Augebinde oder mit em Verspräche,
as sie uf die angeri Site luege, durefahre.
7.
Ab sofot wird
füre Übergang übere Passwang ä Maut (Strossezoll) igrichtet. Mit dene Iname cha
me sämtlichi nöiafauende Chöschte zahle. Zahlstöue mache mer vor und hingerem
Tunnu, de miesse mr de Beibler nüt abgeh. Inkasso wird vo der Gmeinsbehörde
übernoh.
Die Agstöute vom Gmeinhuus hei, nachdäm
sie öis ä guete Appero serviert hei, sofort Ferie. Ihri Arbet wird vom Jodlerklub
übernoh. Em Rüschu, im nöie Oberhaupt vo dr Gmein, darf me ruehig au am morge
am föifi alüte, wenn me öppis z`reklamiere het, är isch jo de sowieso noni
deheime.
I(ich), dr Obernarr Rüschu dr Erscht
verspriche, ass öisi Gmein i nöchschter Zit sich uf vüu Überraschige cha gfasst
mache.
